​ദോഹ: "അറബ് രാജ്യങ്ങളിലെ ഉന്നത വിദ്യാഭ്യാസത്തിലെ പഠനത്തിന്റെ പുതിയ അന്തരീക്ഷം" എന്ന പ്രമേയത്തിൽ, ഉന്നത വിദ്യാഭ്യാസ മേഖലയിലെ മാറ്റങ്ങളും അക്കാദമിക് ഭാവി സാധ്യതകളും ചർച്ച ചെയ്യുന്ന അഞ്ചാമത് യുനെസ്കോ സമ്മേളനത്തിന് ഇന്ന് ദോഹയിൽ തുടക്കമായി. വിദ്യാഭ്യാസ, ഉന്നത വിദ്യാഭ്യാസ മന്ത്രാലയം യുനെസ്കോ (UNESCO), ഖത്തർ നാഷണൽ കമ്മീഷൻ ഫോർ എഡ്യൂക്കേഷൻ, കൾച്ചർ ആൻഡ് സയൻസ് എന്നിവയുമായി സഹകരിച്ചാണ് രണ്ട് ദിവസത്തെ ഉച്ചകോടി സംഘടിപ്പിക്കുന്നത്.
​വിദ്യാഭ്യാസ, ഉന്നത വിദ്യാഭ്യാസ മന്ത്രി ലുൽവ ബിന്ത് റാഷിദ് ബിൻ മുഹമ്മദ് അൽ ഖാത്തിറിന്റെ രക്ഷാകർതൃത്വത്തിൽ നടക്കുന്ന സമ്മേളനത്തിൽ പ്രമുഖ അക്കാദമിക് വിദഗ്ദ്ധരും നയരൂപീകരണ വിദഗ്ദ്ധരും പ്രാദേശിക-അന്തർദേശീയ സർവ്വകലാശാലാ പ്രതിനിധികളും പങ്കെടുക്കുന്നുണ്ട്. 2030-ന് ശേഷമുള്ള ഉന്നത വിദ്യാഭ്യാസത്തിന്റെ ഭാവി, ശാസ്ത്ര ഗവേഷണം, ഇന്നൊവേഷൻ, വിദ്യാഭ്യാസ മേഖലയിലെ ഡിജിറ്റൽ പരിവർത്തനം എന്നിവയാണ് പ്രധാന ചർച്ചാവിഷയങ്ങൾ.യുനെസ്കോ സമ്മേളനത്തിന് ദോഹ വേദിയാകുന്നത് വിദ്യാഭ്യാസ, ഗവേഷണ, ഇന്നൊവേഷൻ രംഗങ്ങളിൽ ഖത്തറിന്റെ അന്താരാഷ്ട്ര പദവിയെ ഉദാഹരിക്കുന്നതാണെന്ന് ഖത്തർ നാഷണൽ കമ്മീഷൻ ഫോർ എഡ്യൂക്കേഷൻ, കൾച്ചർ ആൻഡ് സയൻസ് സെക്രട്ടറി ജനറൽ നൗഫ് ഖാലിദ് അൽ സുവൈദി പറഞ്ഞു. ആർട്ടിഫിഷ്യൽ ഇന്റലിജൻസിന്റെ കാലഘട്ടത്തിൽ ഉന്നത വിദ്യാഭ്യാസത്തിന്റെ ഗുണനിലവാരവും ഭരണവും മെച്ചപ്പെടുത്തുന്നതിനും, തൊഴിൽ വിപണിയുടെ ആവശ്യങ്ങൾക്ക് അനുസൃതമായി പഠനരീതി മാറ്റുന്നതിനും ഈ സമ്മേളനം നിർണായക പങ്ക് വഹിക്കുമെന്നും അവർ കൂട്ടിച്ചേർത്തു.
​സമ്മേളനത്തിന്റെ ഭാഗമായി വിവിധ സർവ്വകലാശാലകളുടെ കോഴ്സുകളും ഗവേഷണ നേട്ടങ്ങളും പ്രദർശിപ്പിക്കുന്ന പ്രദർശനവും സംഘടിപ്പിച്ചിട്ടുണ്ട്. ഖത്തർ സർവ്വകലാശാല, ദോഹ യൂണിവേഴ്സിറ്റി ഓഫ് സയൻസ് ആൻഡ് ടെക്നോളജി, ഖത്തർ സയൻസ് ആൻഡ് ടെക്നോളജി പാർക്ക് എന്നിവടങ്ങളിലേക്ക് പ്രതിനിധികൾക്കായി ഫീൽഡ് വിസിറ്റുകളും ക്രമീകരിച്ചിട്ടുണ്ട്. അറിവാധിഷ്ഠിത സമ്പദ്‌വ്യവസ്ഥ കെട്ടിപ്പടുക്കുന്ന ഖത്തർ നാഷണൽ വിഷൻ ലക്ഷ്യങ്ങൾക്ക് ഊന്നൽ നൽകുന്നതാണ് ഈ രാജ്യാന്തര സമ്മേളനം.